प्रधानमन्त्री ओलीले बुधबार दिउँसो १ बजेका लागि मन्त्रिपरिषद बैठक बोलाएको एक मन्त्रीले बताए ।

नेकपाको सचिवालय बैठक पनि बुधबार दिउँसो १ बजे बस्ने पूर्वनिर्धारित छ ।

ओलीविरुद्ध दोस्रो वरीयताका अध्यक्ष पुष्पकमल दाहाल ‘प्रचण्ड’ले विभिन्न आरोपहरूसहित सचिवालय बैठकमा राजनीतिक प्रतिवेदन पेश गरेका छन् । सो प्रतिवेदन रोक्न ओलीले भरपुर प्रयास गरेका छन् ।

प्रतिवेदनका कारण ओली र दाहालबीच सम्बन्ध बिग्रिएको छ । ओली समूहले राजनीतिक प्रतिवेदनलाई दाहालको व्यक्तिगत कुण्ठा र अभियोग पत्रको संज्ञा दिएको छ ।

ओलीले सचिवालय बैठकसँग जुधाएर मन्त्रिपरिषदको बैठक बोलाएपछि दोस्रो वरीयताका अध्यक्ष दाहाललाई तनाब भएको छ ।

ओलीले जानेर सचिवालय बैठक रोक्न मन्त्रिपरिषदको बैठक बोलाएको दाहाल निकटका नेताहरूको आरोप छ । – दैनिक नेपालबाट