English
कैलाली । कैलाली गौरिगंगा नगरपालिकाका प्रमुख भीम देउवाले आफ्नो पाँच वर्षीय कार्यकालको प्रगति विवरण सार्वजनिक गरेका छन् ।
उनले आफ्नो कार्यकालमा गरेका महत्त्वपूर्ण उपलब्धिहरू पत्रकार सम्मेलन गर्दै प्रस्तुत गरेका हुन् । देउवाले भौतिक पूर्वाधार तर्फ पाँच वर्षमा उल्लेखनीय काम भएको दाबी गरे ।
नगरमा ११ वटा वडा कार्यालय निर्माण गरेको, नगर कार्यालय निर्माण अन्तिम चरणमा पुगेको र ५ वटा बहुउद्देश्यीय भवन निर्माण गरेको देउवाले बताए ।
नगरमा ६५ किलोमिटर सडक कालोपत्रे गरेको र मुख्य सडकमा ग्राभेल गरेको उनले बताए ।
नगरको मुख्य बजारमा सौर्य बत्ती जडान
गरिएको,सिचाइको लागि ५९२ बोरिङ निर्माण गरेको, नदी नियन्त्रणको लागि ३६ किलोमिटर तटबन्ध गरेको, खानेपानी निर्माण सञ्चालन र धारा व्यवस्थापन गरिएको बताए ।
शिक्षा तर्फ कक्षा १० सम्म निःशुल्क शिक्षाको व्यवस्था, छात्राहरूलाई निःशुल्क स्यानेटरी प्याड वितरण लगायतका कार्यक्रम प्रभावकारी रहेको बताए ।
उनले नेपालमै पहिलो पटक स्वास्थ्य महोत्सव सञ्चालन गरेर नगरको नाम राखेको, स्वास्थ्य सुरक्षा कोषको स्थापना गरेको, गर्भवती महिलालाई निःशुल्क एम्बुलेन्स सेवा दिएको, पूर्ण खोप नगरपालिका घोषणा गरेको समेत बताए ।
नगरप्रमुख देउवाले कृषि तथा आर्थिक विकासमा पाँच वर्षमा धेरै उदाहरणीय काम भएको समेत बताए। विपद् तथा फोहर मैला व्यवस्थापन, सेवा प्रवाह र सुशासन, पर्यटन विकासमा पनि कयौँ कामहरू भएको उनको दाबी छ ।
नगरप्रमुख देउवाले दुई दशक पछि जनप्रतिनिधि भएर आउँदा विभिन्न समस्याहरू रहेको भन्दै क्रमिक रूपमा ती समस्याहरू हल भएको समेत बताए ।
आफूहरूले नगरपालिकामा जग बसाइदिएको भन्दै उनले अब आउने नगरप्रमुखले त्यसलाई निरन्तरता दिए समृद्ध नगर बन्ने विश्वास व्यक्त गरेका थिए ।
देउवा २०७४ सालको स्थानीय तह निर्वाचनमा नेकपा एमालेबाट विजयी भएका थिए । उनको भोलि कार्यकाल सकिँदै छ ।
उनीसँगै पराजित भएका माओवादी केन्द्रका उम्मेदवार देवीदत्त कँडेल अहिले नगर प्रमुखको दौडमा छन् ।
उनी नगरप्रमुख बन्ने करिब करिब निश्चित जस्तै भइसकेको छ ।
