पाँचथरमा पहिराले घर बगाउँदा बेपत्ता एकै परिवारका ३ सदस्यमध्ये एक जनाको शव भेटियो

अविरल वर्षासँगै पहिरो गएर पाँचथरमा घर बगाउँदा बेपत्ता तीन जनामध्ये एक जना मृत फेला परेका छन्।

पाँचथर जिल्ला प्रहरी कार्यालयका प्रमुख डीएसपी राकेश थापाले आज (शनिबार) बिहान पौने ९ बजे दिएको जानकारीअनुसार पहिरोमा हराएकामध्ये घरमूली ४२ वर्षीय रूपलाल मगरको शव भेटिएको हो।

पाँचथरको फालेलुङ गाउँपालिका–७ विहीदिनका रुपलालको घर शुक्रबार राति अन्दाजी १० बजेतिर पहिराले बगाउँदा बेपत्तामध्ये २ जना अझै फेला परेका छैनन्। रूपलालका श्रीमती ३८ वर्षीया गोमा र १९ वर्षीया भतिजी एलिसा बेपत्ता छन्। डीएसपी थापाले टेलिफोनमा नेपालखबरसँग भने, ‘खोजी जारी छ।’

रुपलालका काका ७१ वर्षीय दलप्रसाद मगर भने पहिरोमा उछिट्टिएर बाँच्न सफल भएका छन्।